الشكوى لغير الله مذله !!!

الشكوى لغير الله مذله !!!
ولكن هذا الموضوع ليس شكوى بقدر ماهو عرض لواقع الحال ،،، العلم سلامتكم
اذكر يوم اني صغير اني كنت فلتة زماني في الإملاء ، يعني ما فيه كلمة ما اعرف اكتبها .. ومرت الايام... وراحت ايام وجت ايام ودخلت الجامعة وتخصصت حاسب آلي ( يعني كمبيوتر بالعربي ) وفي هذه الاثناء بديت اتعرف على شي يقال له " كيبورد " وانا من اول ما شفته يعلم الله اني ما حبيته ... لكن على راي المثل اش حادك يالمسمار قال المطرقة !
وبديت احس ان هالكيبورد جالس يخرب شي بس مدري وشهو هالشي لأن استخدامي له كان في الكتابة بالاحرف الانجليزية .... ومرت الايام (مره ثانيه ) وقدر الله عليّ وصرت راعي منتديات ( وهي بالمناسبة توازي من حيث الدلالة على الدشرة كلمة راعي قهاوي )... وبدت علاقتي في المدعو كيبورد تزيد وهو يخربني ويدشرني كل يوم اكثر من اللي قبله ... وفي يوم من الايام ......
اكتشفت الحقيقة المرّة .. ولا عاد دريت وين اودي وجهي من الناس ... هذه الحقيقة يا محفوظين البقا والسلامه تكمن في اني ضيعت كل قواعد " وقوائم" الإملاء !!!!
وخاصة هذين الحرفين التعيسين ( ظ ) و ( ض ) ولا تهون الهمزات
وصرت مع مرور الايام ما اكتب كلمة فيها حرف من هالحرفين الا لازم اتصل على اي واحد من اللي يحبون الستر واسأله ( هي بعصا والابدون ؟؟)
ولكن الموضوع زاد عن حده وصار كل من قابلني يواسيني ويقترح علي الحلول اشكال والوان ومن (ضمن) <== الله اعلم بحالها هذه الحلول :
- واحد يقول لي اذا جيت تكتب تخيل انك حجازي وانطقها بلهجة اهل الحجاز .. واذا نطقتها اقرب لحرف الدال (د) فهي الله لايعوق بشّر بدون عصا ... اما ان كانك نطقتها اقرب لحرف الزاي (ز) فلا فيها شك انها بعصا !!
ورغم وجاهة هذا الحل الا اني اصلاً ما اعرف اتكلم بلهجة اهل الحجاز .. وصار الحل اني كلما صرت اكتب اتصل على زميل لي من اهل مكه واقول له (اتحداك تقول " ظلام " عشر مرات ) وتتغير الكلمة في كل مرّه حسب الورطه!!!... لين الرجال بدا يشك في تصرفاتي ولا عاد يرد على مكالماتي
- وواحد يقول لي ما عليك منها اصلاً هذي اللي بدون عصا ما لها اي لزمه واسفلها اذا جيت تكتب ولا تعبرها ... لانها حرف زايد ... ويضيف ان العرب ما استفادوا شي من وجود هذا الحرف في لغتهم الا التضييق على خلق الله !
- والثاني يقول ابشرك بيخترعون " كيبورد " توصله باسلاك في جبهتك ( زي حقة تخطيط القلب ) وتصير تقعد قدام الجهاز وما عليك الا تفكر في الكلام اللي تبغى تكتبه وهو يكتبه بنفسه وكفى الله المؤمنين شر القتال !
وصراحة اعجبني الحل الأخير لوجود الامكانيات فانا عندي جبهه من الممكن ان اركب فيها برج جوال .. يعني ما عندي مشكله من هالناحية ،، بس فيه مشكلتين في هالحل الاولى "انهم" باقي ما اخترعوا الجهاز .. والثانيه اني فكرت في بعض الناس ( من زود الانسانية ) اللي ماراح يشتغل معهم الجهاز ... لأنه يشترط انك تفكر قبل ما تكتب .. يعني تخيلت الهلال موصل الاسلاك في جبهته ومرتز قدام الجهاز اربع ساعات يبغى يكتب والجهاز يقول بينه وبين نفسه .. اللهم لك الحمد :
هذه هي مشكلتي با ختصار ... واللي عنده حل لا يبخل علينا .. ترى الحال ما يسر !

وبالنسبة للناس اللي ما عندهم حل وعلشان ما يتحسفون على الدخول .. وتعاطفاً مع هموم الشعب ... اهديهم هذه القصيده للشاعر " المنسم " خالد الردادي :-

سـيداتي .. انـساتي ... سادتي .
.......................الاحـباء . الاعـزاء . الـكرام ..

مـن يـفسر لي خيوط وسادتي !
.......................ومـن يغمض لي عيوني لين انام

بـشروا صـدر الـسما بـقلادتي
.......................وبـلـغوا عـني لـخلاني سـلام

سـيدي مـن يـعترف بـسيادتي
.......................يـنحني لـي وانـحني له باحترام

عـادته يـدمح خـطاي وعـادتي
......................لاذكـرته .. فاحت اسراب الحمام

وامـي قـالت لـي بـيوم ولادتي
........................لاتـموت وباقي بصدرك كلام ..!

غادتي . ! ياغادتي . . ياغادتي .!!
......................والله ان الـلي .. تـسوينه حـرام

صـبي لـسكر حـلاك .. زيادتي
.......................يـاحلو طـعم الرضا بعد الخصام

-----------
وسلامه تسلمك من لوه لها
__________________
.
.
ما أقربك يا الله ...

شـكــ وبارك الله فيك ـــرا لك ...

شـكــ وبارك الله فيك ـــرا لك ... لك مني أجمل تحية .

أطروحه رائع وأبداع متواصل
الله يعطيك الف عافيه على الابداع
الله لا يحرمنا من جديدك


.

جزيت خيراااااااااا فارس هجر

شـكــ وبارك الله فيك ـــرا لك ... لك مني أجمل تحية .

مشكوور
اخوي فارس

تحياتي
صمتك ذبحني

شـكــ وبارك الله فيك ـــرا لك ... لك مني أجمل تحية .